Selamat Ultah e Kupang

Sonde rasa kalo lu su 20 tahun.Kupang hari ini lu genap berusia 20 Tahun sejak lu jadi Kota Madya di tahun 1996. Usia 20 Tahun b akui masih sangat muda. Lu masih bisa dipoles dan dibentuk supaya kelak menjadi Kota yang nyaman dan layak dihuni serta sesuai lu punk motto hidup "KASIH" : Kupang, Aman, Sehat, Indah, dan Harmonis.

‌

Hari ini, 20 tahun silam lu punk penampilan beda. Waktu itu, lu belum tahu barias diri dan belum banyak yang incar lu untuk cium lu dengan berbagai macam modus. Bebatuan karang tajam dengan bonsai lu punk gaya waktu itu. Tapi b mo bilang lu, kalo lu punk kepolosan waktu itu bikin beta rindu dengan lu hari ini.

‌

B tahu sekarang banyak yang puja-puji lu karena lu punk penampilan yang terkesan modis dan modern. Tapi lu mesti hati-hati karena dong semua sengaja angkat nae lu ais ko banting. Kenapa b bilang begitu??lu tahu sonde kalau lu hanya diperalat untuk dong punk kepentingan atas nama investasi. B sedih lihat lu sekarang. Lu punk pantai yang indah dengan pasir putih dan ombak yang bagulung manja kayaknya su hilang sond ada bekas. Ketong su sonde bisa lai tidur-tiduran diatas pasir ke dulu. Ketong ju su sonde bisa lai bersenda gurau di laut ke dulu soalnya su banyak buaya plus biaya.

‌Satu lai, dulu betul lu punk penampilan kayak ketinggalan zaman tapi lu punk cantik natural dan komplit. Ada pantai, ada ju sawah deng kebun sayur kangkung. Co sekarang lu loti lu punk diri. Itu semua su sond ada laiii gara-gara kepentingan yang sebenarnya hanya kasi rusak lu.

‌B masih ingat ju kalo dulu lu punk pohon-pohon besar dan beringin banyak. Hampir di setiap lekuk ada, ma co lu lihat sekarang dong su ilang buang semua akhirnya lu punk Oe-Oe dari Oeba sampai Oepura b lihat sedikit lai kering. ‌Sekarang lu su jauh berkembang. Ada banyak jalan baru tapi sama sa jalan banyak ju yang ancor. Kalo dulu sedikit sa jalan ma masih lebe bae sonde ancor ke sekarang. Su begitu jalan baru ma kici-kici nae katumu oto deng oto na su susah.

‌

Lu tahu ko sonde? Saat lu su berubah drastis nie ketong ju su sonde aman laii beda deng dulu lepas motor ju orang sonde ambel. ‌Ketong ju masih ingat kalau dulu lu nie sederhana tapi berkat lu punk sederhana lampu jarang mati. Sekarang saat lu su bagaya, malah lampu mati non stop.

‌

Kupang e...b cuma mo bilang kalo lu punk gaya yang dulu tu lebih eksotis dari sekarang. Lu punk oto bemo sekarang su sonde khas laiii gara-gara aturan yang macam-macam yang dibuat oleh orang dari luar. ‌lu punk perayaan Tahun Baru deng pesta jalanan ju ilang sond ada bekas lagi-lagi gara-gara orang dari luar datang berkuasa dan buat aturan ke di dong punk daerah. Begini su jadinya.

‌

Kupang b akui lu makin sexy hanya talalu kamomos. Dadolek dimana-mana. Got dong tasumbat terus sampah dong batumpuk sampe bau sond ada yang nodek.‌Omong-omong soal got. Kenapa sonde ada got di setiap jalan e...akhirnya lu tahu hujan baru sedikit ma ketong su ke dapat air bah. Air tergenang dimana-mana.

‌Lu punk lapangan bola deng stadion ju su sond tahu urus. Co lu maloi Lasitarda dengan stadion merdeka su sonde jadi doi lai. B sedih!

‌

Baomong lu ni sond tahu abis. Ma kalo bisa b mau lu berkembang tu pake konsep yang jelas bukan asal-asalan sa. ‌Terus lu punk taman kota ju su sonde jelas lai..untung sa ada tamnos kalo sonde na sudah ketong sond bisa pake dudu2 bacarita laiiii..

‌

Satu hal Kupang, semoga lu umur panjang dan bertumbuh menjadi kota yang sukses dan tambah eksotis ke dulu plus modis dan canggih ke sekarang.‌Supaya lu tambah cantik na tolong do taman bunga, trotoar, got bikin yang bae. Bila perlu tiang listrik kalo bisa sonde ada laii muncul di jalan, pake tanam dalam tanah sa ke luar negeri sana biar kelihatan rapi dan bersih.

‌

Selamat ultah e Kupang

One Love, Love Kupang